Nag-react ang isa sa malapit nga abogado sang Duterte Family nga si Atty. Jimmy Bondoc matapos ang mga ginbuy-an nga alegasyon ni former Senator Antonio Trillanes IV.
Si Bondoc ang nagaserbe man bilang Executive Vice President sang PDP Laban kun sa diin myembro ang mga Duterte.
Suno sa social media post sang abogado, mahimo na nga magamit sang Senate Impeachment Court kag ni presiding officer Francis “Chiz” Escudero ang ‘contempt powers’ sini matapos ang nangin press conference sang anay senador, subong nga nagapadayun pa ang trial.
Sa ginpatigayon nga presscon ni Trillanes, nagpahayag ini nga nakabatun ang mga Duterte sang minilyon nga kwarta halin sa Chinese government-linked sources kag nakabatun man sa gintawag sini nga drug lord kag negosyante nga si Samuel “Sammy” Uy.
Madumduman nga magatestigo kuntani si former Senator Trillanes sa impeachment trial batok kay VP Sara may kaangtanan sa ginapahayag Unexplained wealth sang bise presidente, apang gin-withdraw sini ang iya pangalan kag naghaboy na lang sang iya mga alegasyon sa kontrobersyal nga pamilya pinaagi sa iya presscon.
Sa amo nga presscon, nakamensyonar pa si Trillanes nga dapat bantayan gid si Escudero.
