ILOILO CITY – Madamo ang ginatungdan nga function sang bone ukon tul-an sa lawas.
Sa programa Doktor Bombo, ginpaathag sang Medical expert nga si Dr. Elvin Tiangha kun daw ano ka importante ang tul-an.
Suno kay Dr. Tiangha, ang bone ukon tul-an ang isa ka rigid organ nga kabahin sang human skeletal system kag vertebrate skeleton sang sapat kag ini ang ginabug-usan sang cells nga yara sa hard intercellular material kun sa diin ang duha ka principal components sini amo ang collagen kag calcium phosphate.
Lakip sa function sang tul-an suno kay Dr. Tiangha amo ang paghatag sang framework kag support sa lawas, force transmission para sa body movement, paghatag sang proteksyon sa internal organs, blood cell generation and maintenance ukon hematopoiesis kag nagaserbe man nga storage sang minerals.
Apisar nga mabaskog ang tul-an, mahimo ini nga maggabok bangud sa pila ka mga rason kag lakip diri amo ang kakulang sang minerals, katigulangon, unhealthy lifestyle kag medical disorder.
Agud nga makalikaw ukon mapahagan-hagan ang paggabok sang tul-an ukon osteoporosis, nagakadapat nga may yara sang healthy kag varied diet kasubong sang preska nga prutas, utan kag whole grains, pagkaon sang calcium-rich foods, vitamin D intake, paglikaw sa pagpanigarilyo, pag-limit sang alcohol consumption kag caffeine kag ang pagpatigayon sang weight-bearing kag strength-training activities.
Nahibalu-an nga santo sa Proclamation No. 658 nga ginpirmahan ni anay Presidente Gloria Macapagal-Arroyo sang 2004, gindeklarar ang ika-tatlo nga semana sang Oktubre bilang “Bone & Joint (Musculo-Skeletal) Disorders Awareness Week”.
