Nagpirma sanday Senator Ronald “Bato” Dela Rosa kag Senator Christopher “Bong” Go sa resolution nga nagapanawagan nga dal-on pauli sa Pilipinas si former president Rodrigo Duterte.
Ini nga resolution ang ginbalay kag gin-file ni Senator Robin Padilla sang Hunyo 23, apang wala na ini ginbaton sang Bills and Index Section sang Senado bangud sang amo nga tion, nagtakop na ang 19th Congress.
Natalana pa lang nga i-file liwat ang resolution sa 20th Congress.
Pahayag ni Padilla, panawagan ini sa gobyerno nga iproseso ang insigida nga repatriation sa former president.
Isa man ini ka panawagan suno sa iya para sa “unity”, respeto sa soberanya sang Pilipinas, kag hustisya para sa anay presidente nga maisog suno sa iya nga nagserbe anay sa nasyon.
Pahayag pa sang long-time Duterte ally, bukas siya sa iban pa gid nga mga senador nga magapirma sa amo nga resolution sa masunod nga mga inadlaw.
Marso 11 sang gindakop si Duterte sa NAIA, kag ginlupad padulong sa The Hague, Netherlands agud nga atubangon ang kaso sini nga crimes against humanity nga nag-ugat sa kontrobersyal nga drug war. Naka-detain siya sa ICC facility samtang nga ginahulat ang confirmation of charges sa Septyembre 23, 2025.
