Ginpangalanan ni Ombudsman Jesus Crispin “Boying” Remulla si Senador Christopher Lawrence “Bong” Go nga posible nga gina-protektahan sang mag-asawa nga kontraktor nga sanday Curlee kag Sarah Discaya.
Ini matapos ginbawi sang mag-asawa ang ila nauna nga desisyon nga magakooperar sila sa Independent Commission for Infrastructure (ICI).
Suno kay Ombudsman Remulla, wala na siya nakibot sa ginhimo sang mag-asawa bangud nakahibalo siya nga may ginatago sila nga mga tawo kaangay kay Senador Go.
“Evasive talaga siya. Hindi niya talaga sasabihin lahat. Selective lang. Meron siyang selective recall ng mga bagay-bagay,” suno kay Remulla.
“He’s protecting people, like Bong Go. Kasi nga, yung joint venture nila, eight projects worth P800 million. Doon sila nagsimulang lumaki. But they will not talk about it,” dugang sang opisyal.
Ang ginatumod sang Ombudsman amo ang joint ventures nga ginsudlan sang kumpaniya sang mga Discaya nga St. Gerrard Construction kag ang CLTG Builders nga amo naman ang contractor nga ginadumala sang amay kag utod ni Senator Go.
Nag-umpisa ini nga joint ventures sang 2017 sang tion nga nagaserbe pa lamang si Go bilang Special Assistant ni anay President Rodrigo Duterte.
Ini nga isyu ang nagtuhaw kadungan sang state witness evaluation sa mga Discaya kag sa case buildup nga ginapatigayon sang Department of Justice (DOJ).
Ginkumpirmar naman ni DPWH Secretary Vince Dizon nga magapatigayon sila kag ang Office of the Ombudsman sang imbestigasyon batuk sa CLTG Builders.
Suno kay Dizon, ipasa nila sa Ombudsman ang tanan nga kontrata sang mga Discaya halin pa 2016 tubtob 2025 para sa madalom pa gid nga beripikasyon.
Nanindugan naman si Bong Go nga wala siya sang kaangtanan sa mga Discaya. Nag-distansya man si Go sa negosyo sang iya pamilya, bangud suno sa iya, wala man siya sang kontrol diri.
“Ako po’y isang senador. Hindi po ako negosyante, hindi po ako contractor. Sana po huwag malihis po yung katotohanan,” suno sa senador.
“Hindi ko kilala yung Discaya. At let me repeat, hindi po ako nakikipag-usap ng any government contracts o government transaction,” dugang sini.
