Ginkumpirma sang Philippine National Police (PNP) paagi sa isa ka official statement nga boluntaryo nga nagsungka sa PNP National Headquarters sa Camp Crame si former Senator Ramon “Bong” Revilla Jr.
Gin-updan siya sang iya nga asawa kag mga kabataan.
“Upon his arrival, the Criminal Investigation and Detection Group (CIDG) was immediately summoned to serve the warrant of arrest issued against him. The warrant was duly implemented, and the former senator was formally informed of the nature of his arrest and his constitutional rights,” suno sa statement.
Gilayon man ini nga ginpaidalom sa standard booking kag documentation procedures lakip na sa medical examination.
Ang pagsungka sang former senator ang kasunod sang arrest warrant nga gindagdag sang Sandiganbayan 3rd Division sa iya kag sa anum ka iban pa kaangot sa non-bailable malversation case bangud sang maanomaliya nga proyekto sa Pandi, Bulacan.
Antes nag-abot sa Camp Crame, naka-Facebook Live pa si Revilla kun sa diin iya ginpasalig nga indi siya mag-atras kag atubangon sini ang kaso batok sa iya.
“Nakakalungkot po, parang wala yatang due process,” suno kay Revilla. Apang dugang niya, “Haharapin ko to nang walang takot. Alam kong hindi ako pababayaan ng Diyos, dahil wala akong kasalanan dito.”
Suno pa sa iya, indi niya malaragway ang iya ginabatyag subong. “Napakasakit po para sa akin, at sa aking pamilya.”
Antes nagtapos ang video, nagpalagas pa ini nga: “Alam kong hindi ako pababayaan ng Diyos. Please pray for me.”
Nahibaluan nga magluwas sa arrest warrant nga ginpaguwa sang Sandiganbayan, may hold departure order man batok kay Revilla kag sa anum ka iban pa nga mga personalidad kaangot sa non-bailable case nga malversation. Kaangot ini sa ginaalegar nga P92.8 million ghost flood control project sa Pandi, Bulacan.
Na-implicate si Revilla sa infrastructure corruption issue matapos ginpanglawag anay ni former Public Works Undersecretary Roberto Bernardo ang pangalan sang mga senador kag kongresista nga ginaalegar nakabaton sang kickbacks sa Department of Public Works and Highways (DPWH) projects.#
Photo: Mark Villeza/Philippine Star
