Ginkondena kag ginapangayuan sang public apology si Quezon City 4th District Representative Bong Suntay kasunod sang nangin pahayag sini sa hearing sang Kamara nga ginalantaw nga isa ka pagbastos sa mga babaye.

Lakip sa nagpakamalaot sang statement ni Suntay amo si Gabriela Party List Rep. Sarah Elago nga nagsiling nga isa ka maathag nga pagpangbastos kag pag-objectify sa mga kababainhan ang ginhimo sang kongresista.

Para naman kay House Committee on Women and Gender Equality Chairperson Ann Matibag, indi simple nga lahog ukon harmless nga komento ang ginhimo ni Suntay kundi “sexist”, makahuluya, kag wala sang lugar sa anuman nga institusyon kun sa diin dapat may respeto kag propesyonalismo.

Mangin si Quezon City Mayor Joy Belmonte ang nagtulod sa kongresista nga mangin accountable kag magpangayo sang pasensya kasunod sa amo nga statement.

Natabo ang komento ni Suntay samtang nagatutok ang deliberasyon sang House Committee on Justice sa impeachment complaints batok kay Vice President Sara Duterte.

Gindepensahan ni Suntay si Duterte kag ang mga nagligad nga statement sini kaangay sang pag-imagine sini nga utdan sang ulo si President Ferdinand “Bongbong” Marcos, Jr.

Diri kag ginsal-ot ni Suntay ang iya kaugalingon nga imagination.

Suno sa iya, nakit-an sini anay sa isa ka mall si Anne Curtis, kag bangud tuman ini kagwapa, may “desire” siya suno sa iya nga nabatyagan kag na-“imagine” na lang niya kun ano ang iya himuon.

Diri na kag gilayon nga nagsabat si Committee Vice Chair Ysabel Maria Zamora nga panason sa rekord ang pahayag ni Suntay, apang nagpanindugan pa si Suntay. May yara naman sang nag-object sa amo nga manipestasyon.

Nagboto pa ang panel kun sa diin 13 ang nagpabor nga kakason sa rekord ang pahayag ni Suntay, duha ang nagboto nga indi pagkakason lakip na mismo si Suntay, kag duha naman ang nag-abstain.

Sang ulihi, nag-reklamo pa gid ang kongresista kun ngaa may gina-censor nga mga manifestation sa House hearing. Nagpanindugan ini nga indi man imoral kag indi iligal ang iya komento.

Diri na kag nagsabat si Zamora kag ginpahanumdom pa kay Suntay nga pamuno pa lang gani sang Women’s Month apang may amo na sini nga mga komento. Ginpaathag pa sini nga ang kaangay sini nga mga pahayag wala nagabulig agud nga masuportahan kag ma-empower ang mga kababainhan.

Apisar sang amo nga hitabo sa panel, nagpanindugan naman si Suntay nga wala siya sang sala: “Only a dirty mind can impute something which is dirty.”#