Duda ang isa ka political analyst kun magatambong na si presidential candidate former Senator Ferdinand Bongbong Marcos, Jr. sa debate nga iga-organisar sang Commission on Elections (Comelec) apisar nga ihatag sang abanse ang “general idea” sang debate topics.
Una diri, mismo si Marcos ang nagpahayag sa isa ka ambush interview nga indi pa siya sigurado kun yara ang iya nga presensya sa debate sa Marso 19 bangud ginalantaw pa niya kun ano ang mangin format.
Ang Comelec naman ang nagpasugot na nga mag-release sang ‘general idea’ kun ano ang mga topiko sa amo nga adlaw agud nga mangin ‘fair’ man sa tagsa ka kandidato.
Sa interview sang Bombo Radyo kay Atty. Joenar Pueblo, iya ginpahayag nga mangin makakilibot ang desisyon ni Marcos kun magpasugot na ini nga magtambong sa debate.
Ini bangud ginalantaw ni Pueblo nga gina-maintain na lang sang kampo ni Marcos ang figures samtang nagahilapit ang eleksyon: buot silingon, indi sini luyag nga mabuhinan ang iya nga boto — kun halimbawa — indi mangin maayo ang iya nga performance sa tunga-tunga sang mga masumalang nga pamangkot.
Magluwas diri suno kay Pueblo, posible nga nakit-an sang kampo ni Marcos nga leading man gihapon ini sa presidential surveys apisar nga pila ka beses naman ini nag-snub sang presidential interviews kag forums.
Kun madumduman, ang lamang gintambungan ni Marcos amo ang mga debate nga gina-host sang media kag grupo nga ginapahayag kilala nga ‘friendly’ sa iya.
SIN-O NAMAN ANG MAKABENEPISYO KUN MAGPADAYON SA PAGTAMBONG SA PRESIDENTIAL DEBATE?
Ang debate ang tion suno kay Pueblo agud nga ma-presentar sang kandidato ang iya nga political awareness kag kun paano sini madala ang iya nga kaugalingon sa tunga sang mga kabudlayan.
Diri halimbawa makit-an kun paano mag-responde ang lider sa tion sang pressure— halimbawa sa krisis, sa isyu sa China, sa kalamidad sa pungsod, sa pamahog sang terorista, kag iban pa nga nagalakip sang national concern.
Sa assessment ni Pueblo, ang pinaka-benepisyo halin sang ginpatigayon ang nagliligad nga mga debate amo ang labor leader nga si Ka Leody De Guzman.
Ginpahayag ni Pueblo nga kun halimbawa indi man magdaog si De Guzman subong nga tuig, sigurado nga magtatak na ang iya nga pangalan sa publiko kag pwede sini magamit sa masunod nga eleksyon bangud nangin maayo man ang iya mga sabat sa nagliligad nga forums kag debate. ##
