Wala ginpatapos ni former Department of Public Works and Highways (DPWH) Secretary Manuel “Manny” Bonoan ang hearing sang Senate Blue Ribbon Committee kaangot sa ma-anomaliya nga flood control projects.
Personal siya nga nagtambong sa ikaduha nga hearing sang panel, apang naghimo siya sang manipestasyon kun mahimo siya i-excuse bangud indi na siya ang tiglikom sang ahensya kasunod sang iya resignation nga epektibo subong nga Septyembre 1.
“In view of this circumstance, Your Honor, that effective today, September 1, since I am no longer the secretary of Public Works and Highways and I don’t have the official capacity to represent the department, that I may be excused on the proceedings at this point in time,” pahayag sini kay panel chairperson Rodante Marcoleta.
Gin-grant ni Marcoleta ang hingyo ni Bonoan apang ginsiguro man nga may magahambal para sa department kun may palamangkutanon ang mga senador.
“Your Honor, the people that had been invited from the Department are all here,” dugang sini.
Kahapon, Agusto 31, gin-anunsyo sang Malacañang ang pag-resign ni Bonoan sa tunga sang mga eskandalo sang kurapsyon sa ahensya partikular na sa flood control projects. Si Vince Dizon nga amo anay ang tiglikom sang Department of Transportation (DOTr) amo ang nagbulos sa iya sa posisyon.#
