Nagapamalibad si Public Works Secretary Manuel Bonoan nga bayaan ang iya pwesto samtang nagapadayon ang imbestigasyon sa ginaalegar nga kurapsyon sa flood control projects.
Suno kay Bonoan, ang pag-resign indi amo ang nagakaigo nga tikang agud nga i-address ang problema.
Gin-ako sini nga nabatian niya ang mga panawagan nga mag-leave siya ukon manaog siya sa pwesto, apang suno sa iya, indi siya magtalikod sa iya nga katungdanan bilang tiglikom.
“Meron nga nananawagan sa akin na ako po raw ay mag-leave o kaya po ay mag-resign dahil po sa isyung ito. ‘Yan po sana ang madaling gawin, mag-resign o talikuran ko ang problema. Pero hindi po ang pag-alis o pag-iwas ng responsibilidad ang tamang paraan ng paghahanap ng solusyon,” kabahin sang iya nga video message.
“Sa akin po, tatanggapin ko ang accountability pero tandaan po ninyo, hindi ko po kukonsintihin at papayagan ang anumang uri ng korupsyon na nangyayari,” dugang sini.
Ginpanindugan man sang tiglikom nga mas madamo ang disente nga mga tawo sa ila nga ahensya ipaanggid sa mga involved sa anomaliya.
Ini apisar sa mga nadiskubrehan nga mga “ghost projects” sa Bulacan 1st District Engineering Office. Sa Batangas naman, gindakop ang head sang 1st District Engineering Office bangud sa tuyo sini nga suhulan ang isa ka congressman agud nga untaton ang imbestigasyon sa infrastructure projects sang ahensya.
Nagdugang man ang tiglikom nga pasabton ang dapat nga manabat kag ipapreso ang dapat nga mapreso kun mapamatud-an nga involved sa mga anomaliya.
Matandaan nga nagtukod na ang ahensya sang Anti-Corruption Task Force agud ma-engganyo ang publiko nga i-report sa awtoridad ang kwestyonable nga mga proyekto.
