ILOILO CITY – Gin-ako sag kapulisan sa Western Visayas nga isa sa mga “soft target” sang terorismo ang isla sang Boracay kag ang siyudad sang Iloilo.
Sa interview sang Bombo Radyo Iloilo, ginpahayag ni Police Regional Office (PRO-6) director C/Supt. Jose Gentiles nga apisar wala sang specific threat, may mga nabaton sila nga unvalidated reports.
Mas makapaayo suno sa regional director kun madula ang mga pamahog sang terorismo sa rehiyon bangud madamo sang tourist destination sa isla sang Panay kag naga-uswag ang ekonomiya sang rehiyon.
Ginpahayag ni Gentiles nga isa sa mga indi nila gusto matabo nga makasulod ang Maute terror group sa Region 6, rason nga ila ginahingyo ang bulig sa Muslim community sa Western Visayas agud magbantay sa mga Muslim nga nagasulod sa rehiyon ilabi na ang nagikan sa Mindanao.
Ginpahayag naman sa Bombo Radyo ni Hadji Muammar Faisal Arumpa, chairperson sang United Federation of Muslim Association in Western Visayas nga nagtukod sila sang screening committee agud busision ang background sang mga Muslims nga nagasulod sa rehiyon.