Gin-anunsyo sang tour operators nga nag-bukas na liwat ang border city sang North Korea sa mga turista nga gusto maglagaw sa ila nga pungsod.
Ginpahayag nga nabaton na ang notification nga pwede na makabisita ang foreign travelers sa northeastern North Korean city sang Rason. Suno pa sa travel agency nga Young Pioneer Tours, ang special economic zone (SEZ) nga naga-border sa China kag Russia ang ginbuksan na epektibo kahapon sa tanan nga foreign guests.
Ang syudad sang Rason amo ang una nga SEZ sang North Korea sang 1991 kag nangin testing ground para sa bag-o nga economic policies.
Diri man halin ang una nga legal marketplace kag may separate visa regime ipaanggid sa nabilin nga mga lugar sa amo nga pungsod.
Matandaan nga sang 2020, nagpanirado ang North Korea kag wala nagpasulod sang foreigners agud nga malikawan ang pagsulod sang coronavirus. Sang ulihi, mas ginpabaskog pa ang ila depensa sa northern boundary sa China agud mapunggan ang North Korean nationals nga iligal nga magsulod liwat sa Pyongyang.
Sang nagligad nga tuig, may Russian tourists na nga amo ang ginpasugtan nga labing-una nga magsulod sa amo nga pungsod halin sang natabo ang pandemic.#
