PASSI CITY – Anom ka mga Barangay sa Passi City ang may yara sang border control nga ginapatuman padulong sa Capiz.
Ini ang may kaangtanan sa pagpangudal nga ginahimo sang probinsya umpisa subong nga adlaw sa diin indi na pagpahanugutan pa nga may makasulod kag makaguwa sa probinsya halin sa iban man nga probinsya.
Sa interview sang Bombo Radyo kay Passi City Mayor Stephen Palmares, iya ginpahayag nga health personnel kag mga kapulisan ang nagabantay sa kada border control points agud masiguro nga indi makaguwa kag makasulod ang sin-o man nga tawo.
Suno kay Palmares, wala na siya sang may idugang pa sa Executive Order nga ginapaguwa ni Iloilo Gov. Arthur Defensor Jr. kag iya na lamang ini nga ipatuman.
Sa tion nga may magpamilit nga magsulod ukon makaguwa sa probinsya nga indi man lang importante ang katuyu-an, may yara ini sang kaso nga paga-atubangon.
