BATAD, ILOILO – Istrikto nga ipatuman ang border restrictions sa Batad, Iloilo kasunod sang na record sang local transmission sang Coronavirus Disease 2019 (COVID-19).
Sa interview sang Bombo Radyo kay Mayor Elvira Alarcon, iya ginpahayag nga may isa ka empleyado sang Local Government Unit nga nagpositibo sa COVID-19 matapos nakatambong sa isa ka programa sa banwa sang Estancia.
Suno kay Alarcon, ang nasambit nga empleyado ang naka-upod niya mismo sa pagtambong sang nasambit man nga programa apang negatibo ang resulta sang iya confirmatory test samtang nagpatigayon gilayon sang contact tracing.
Ginpahayag ni Alarcon nga nagapabilin nga asymptomatic ang pasyente samtang siya naman ang naka-home quarantine kag natalana nga magpaidalom liwat sa COVID-19 test.
Bangud sini, nadesisyunan sang alkalde nga magpatuman sang border restrictions agud malimitahan ang pagguwa-sulod sa banwa sang Batad magluwas lang sa delivery sang basic goods kag iban pa nga kinahanglanon, mga nagatrabaho nga frontliners, nagapatigayon sang emergency kag humanitarian efforts kag ang mga government officials kag employees nga may yara sang official function.
Magluwas diri, pagadumili-an man ang angkas sa motorsiklo bilang kabahin sang precautionary measure.
