Magaumpisa na bwas nga adlaw, Abril 19 tubtob Abril 29 ang border restriction sa Lambunao, Iloilo kag Calinog, Iloilo.
Ini ang kasunod sang Executive Order no. 23 series of 2021 nga ginpapanaog ni Lambunao, Iloilo Mayor Reynor Gonzales matapos nagtimbuok ang kaso sang COVID-19 sa banwa sang Calinog, Iloilo.
Sa exclusive interview sang Bombo Radyo kay Lambunao, Iloilo Vice Mayor Arvin Losaria, iya ginpahayag nga ang checkpoints ang patigayunon sa entrypoints sang banwa sang Lambunao partikular sa Barangay, Maribong, Buwang, Malag-it, Alugmawa kag Cabunlawan.
Suno kay Losaria, indi man pagpahanugutan ang loading kag unloading sang mga pasahero sang public utility vehicles sang Calinog sa bisan diin nga bahin sang Lambunao lakip na ang sa Lambunao Public Transport Terminal.
Ginpahayag sang bise-alkalde nga ang mga residente sang Lambunao ang mahimo makacross border sa banwa sang Calinog apang indi pagpahanugutan nga makabalik sa Lambunao tubtob wala pa malift ang border restriction.
Ini man makasulod ang mga depampasahero nga mga traysikol nga nagikan sa banwa sang Calinog sa mga boundary sang banwa sang Lambunao agud magkuha sang mga pasahero sa Barangay Maribong kag Barangay Gines and vice versa.
Pahanugutan lamang nga makalabay ang mga private vehicle sa banwa sang Lambunao apang nagakadapat nga wala sang stop-over ukon pagpanaog sa bisan diin nga bahin sang amo nga banwa kag nagakadapat nga masunod sang mga driver kag pasahero ang minimum health protocols.
Samtang, yari naman ang mga Authorized Persons Outside of Residence (APORs) nga pahanugutan nga makagwa kag pasulod sa border restrictions kag checkpoints:
- Health kag emergency frontline services personnel;
- Government officials kag government frontline services;
- Duly authorized humanitarian assistance actors;
- Mga indibidwal nga magabyahe para sa medikal kag humanitarian reasons;
- Mga indibidwal nga padulong sa airport ukon nagapauli nagikan sa airport sa diin nagakadapat nga wala sang untat ang travel halin sa border padulong sa airport and vice versa; kag
- Mga indibidwal nga padulong sa trabaho ukon negosyo magluwas sa mga nagatrabaho sa COVID-19 affected establishments.
Katuyuan sini suno kay Losaria nga maproteksyunan batok sa COVID-19 indi lamang ang mga residente sang Lambunao kag Calinog, Iloilo kundi lakip na ang mga kaiping nga mga banwa.
Nagpangabay ang opisyal sa publiko nga magsunod sa desisyon sang mga otoridad agud malikawan ang pagtimbuok sang kaso sang COVID-19.
