ILOILO – Gin-athag ni Iloilo Gov. Arthur Defensor Jr. nga wala gindula ang border restriction sang Iloilo sa Bacolod City kag Negros Occidental.
Sa interview sang Bombo Radyo kay Defensor, iya ginpahayag nga indi madali-dali ang pagkuha sang travel restriction bangud sa risgo.
Suno kay Defensor, mas makapaayo sa subong nga wala anay sang inter-zonal travel sa probinsya sang Iloilo magluwas lang sa Iloilo City agud nga indi maglala ang COVID-19 situation sa rason nga indi masarangan sang Iloilo Provincial Government nga i-lockdown ang kalabanan nga lugar kag magdamo ang magatinir sa quarantine facility.
Ginpahayag ni Defensor nga ginatahod niya ang desisyon sang Iloilo City kag Bacolod City Government nga pahanugutan na ang sea travel.
Bilang pangaman sang probinsya, ginapatuman ang reverse isolation sa mga may yara sang exposure sa COVID-19 ukon ang mga nakapadulong sa lugar nga may mataas nga kaso sang virus.
Apisar sini, ginpahayag sang Gobernador nga wala sang may ginpatuman nga border restriction sa tunga sang probinsya kag sang syudad sang Iloilo bangud nga konektado ang ekonomiya sang duha ka lugar.
