Magapatuman sang border restrictions ang Iloilo City Government sa kaiping nga mga probinsya sa Panay umpisa sa Mierkules, Mayo 26 tubtob sa Mayo 31.
Indi pagtugutan ang byahe nga Iloilo City-Bacolod City ukon Iloilo City- Negros Occidental and vice versa bilang tikang agud indi na madugangan ang nagataas nga kaso sang COVID-19 sa syudad.
Sa interview sang Bombo Radyo kay Iloilo City Mayor Jerry Trenas, iya ginpahayag nga katuyuan sini nga mapanubo ang posibilidad sang pagdugang sang COVID-19 infections sa tion nga magsimpon ang mga pumuluyo sang syudad kag mga pumuluyo gikan sa kaiping nga probinsya ukon iban nga lugar sa Panay.
Suno kay Trenas, ang mga non-essential businesses ang temporaryo man nga siraduhon tubtob sa katapusan sang bulan.
Ginpahayag sang alkalde nga sa subong, masobra na 80 numero sang mga napatay sa syudad bangud sa COVID-19 sa diin nagsaka na sa masobra 800 ang active cases sang amo nga virus.
Gin-athag man sang alkalde nga padayunon sa gihapon ang pagbaton sa mga locally stranded individuals, Returning overseas Filipinos, kag Authorized Persons outside residence halin sa Manila apang may swab test kun mag-abot sa syudad.
Abiso ni Treñas sa publiko, mag-andam, likawan ang pagwa sa mga balay kun indi kinahanglanon, magsuksok sang face mask sa tanan nga tinion kag mahugas sang mga kamot.
