ILOILO CITY- Magapangudal liwat ang Probinsya sang Iloilo sa tunga sang nagataas nga kaso sang Coronavirus- disease 2019 sa Western Visayas.
Sa interview sang Bombo Radyo kay Iloilo Governor Arthur Defensor Jr., iya ginpahayag nga plano sang probinsya nga siraduhan liwat ang mga borders agud malikawan ang pagsulod kag paglusot sang mga tawo gikan sa iban nga lugar nga mahimo may dala nga Covid-19 ilabi na ang mga Locally Stranded Individuals.
Suno kay Governor Defensor, kabahin man ini sang paggamit sa ginhatag nga poder sa mga Local Government Units sa idalom sang Modified General Community Quarantine status with strict local action nga kategorya.
Sa subong suno kay Defensor, ginabalay na ang Executive Order para sa nasambit nga lihok sang provincial government.
