Kaangut sa ginapatuman sang LTO nga “Anti-Sardinas Policy”, nagpahayag si Iloilo City Councilor Atty. Sedfrey Cabaluna, Chairman sang Committee on Transportation, nga isa sa mga nagapanguna nga rason sang overloading sa mga pampasahero nga salakyan amo ang kakulangan sang units sa karsada.
Suno kay Cabaluna sa interview sang Bombo Radyo, nagapadayon ang sistema sang “boundary” kag “commission basis” sa transport sector, rason kun ngaa ginatuyo sang iban nga mga driver nga pun-on ang ila salakyan agud mas daku ang ila kita.
Ginpunto man sang konsehal nga ang overloading indi lang isyu sang disiplina kundi may kaangtanan man sa economic conditions sang mga driver kag operators.
Bangud sini, ginpanawagan ni Cabaluna nga ang Land Transportation Franchising and Regulatory Board (LTFRB) ang dapat magpatuman sang angay nga mga disiplinaryo nga tikang batok sa mga nagalapas sa kapasidad nga ginatugot sang layi.
Ginpanindugan niya nga kinahanglan may hugot nga monitoring kag enforcement nga maghalin mismo sa LTFRB agud masiguro ang kaluwasan kag ‘convenience’ sang mga pasahero.
