Napaslawan ang heavyweight icon nga si Mike Tyson sa iya pagbalik sa ring batok sa Youtuber-turned-prizefighter nga si Jake Paul nga 31-anyos nga mas bataon ipaanggid sa iya.
Nagtapos ang walo ka rounds sa AT&T Stadium sa Arlington, USA, sa unanimous decision nga nagapabor sa 27-anyos nga fighter, 80-72, 79-73 kag 79-73.
Ginhingalitan ni Paul ang paggamit sang iya speed agud nga dominahon ang 58-anyos nga former undisputed heavyweight champion ilabi na sa third round kun sa diin maathag ang iya pagpaulan sang mga sumbag.
Sang weigh-in pa lamang, nangin mainit na ang tensyon sa tunga sang duha sang gintampuyong ni Tyson si Paul rason nga nagpromisa ang mas bataon nga fighter nga i-iknockout gid sini ang iya kasumpong apang wala man natigayon sa adlaw mismo sang sambuwa.
70,000 ka boxing fans ang naglantaw sang live sa amo nga kontrobersyal nga hampang.
Samtang nagahilapit ang pagbagting sang manugtapos na ang ikawalo nga round, nag-bow pa si Paul bilang pagpakita sang pagtahod kay Tyson nga isa sa pinakaamaayo nga boksidor sa kalibutan.
Base sa final statistics, 18 lang sa 97 punches ni Tyson ang nakatupa samtang 278 punches naman ang nahimo ni Paul kag 78 diri ang nakaigu sa boxing icon.
19-anyos na ang nagligad halin sang katapusan nga naghampang sa professional boxing si Tyson kag ginaalegar nga nagpasugot siya sa matchup batok sa bataon nga YouTuber bangud sa bayad nga 20-million USD ukon P1.17-billion.
Antes ang pagretiro ni Tyson sa propesyonal nga boksing sang 2005, may impresibo siya nga record nga 50-6 nga may 44 knockouts.
Pinaka-kilala siya sa iya paghari sa heavyweight division sang late 1980s.
Una na nga gin-schedule ang ila hampang ni Paul sang Hulyo apang gin-postpone bangud sa medical treatment kay Tyson bangud sa pagsuka sini sang dugo bangud sa bleeding ulcer.
Kilala naman si Paul sa iya professional boxing career sa super-middle kag cruiserweight.
Halin sa iya una nga away batok sa isa man ka YouTuber sang 2018, nalakip sa mga naatubang ni Paul amo ang isa ka basketball player, mixed martial arts fighters kag iban man nga professional boxers.
Antes ang pag-atubang kay Tyson, sa 11 ka mga hampang sini, 10 ang iya nadag-an kun sa diin pito ang na-knockout.
