Lunsay nag-qualify ang mga Filipina boxers nga sanday Nesthy Petecio kag Aira Villegas para sa 2024 Paris Olympics!
Natabo ini sang ginlutos ni Villegas si Genadieva Chukanova Zlatislava sang Bulgaria sa quarterfinal bout sa 1st World Olympic Qualifiying Tournament sa Italya kaina gid lamang nga kaagahon (oras sa Pilipinas).
Nangin mabudlay para kay Villegas nga makuha ang kadalag-an sa women’s 50kg class kun sa diin tatlo sa lima ka judges ang nag-settle pa para sa tie samtang duha naman ang nagpabor sa Pinay.
Nadag-an ni Villegas ang nauna nga duha ka rounds apang nabuhinan ini sang isa ka point bangud sa holding; kag nadugangan pa sang natumba ini sa ikatatlo nga round matapos ang right straight halin sa kasumpong nga nag-igu gid sa iya ulo.
Nagbangon ang Leyte pride tubtub nga nakabawi kag nabulsa ang ticket para sa iya labing-una nga pagtapak sa Olympic.
Sa pihak nga bahin, pila ka minutos lamang matapos nabulsa ni Villegas ang isa ka Olympic spot, ginpasagunsunan ini ni Petecio matapos nga ginlutos si Esra Yildiz Kahraman sang Turkey via split decision sa ila nga semifinal bout.
Ini pa lamang ang nagaisahanon nga split decision victory para kay Petecio sa tournament bangud nadag-an sini ang nauna nga apat ka sambuwa via unanimous decision kag stoppage.
Magluwas nga may ticket na sa Olympics, magatungtong man si Petecio sa gold medal round sa women’s 57kg category.
Silver medalist ang nasambit nga boksidor sa 2020 Olympics sa Japan. Una na sini ginsiling nga indi siya mag-untat tubtob indi makuha ang gold medal sa Olympida.
Magluwas kanday Villegas kag Petecio, nauna na ang Pinoy boxer nga si Eumir Marcial sa pag-qualify para sa Olympics 2024 matapos ini nagtapak sa final round sa Asian Games sa China. ##
