ILOILO – Ginakabig sang pamunuan sang Boy Scouts of the Philippines (BSP) nga isolated case ang natabo nga pagpanglingling sang isa ka maestro sa isa ka babaye nga non-teaching personnel samtang nagapaligo sa sulod sang improvised comfort room kadungan sang Iloilo Scout Invitational Jamboree sa Sub-Camp Tarangban, Camp Hinilawod De Calinog sa Brgy. Libot, Calinog, Iloilo.
Ang tagreklamo ang taga-Ajuy, Iloilo samtang ang ginreklamo nga maestro ang taga-Bingawan, Iloilo.
Sa interview sang Bombo Radyo kay Board Member Matt Palabrica, chairman sang BSP-Iloilo Confessor Council, iya ginpahayag nga gilayon sila nga nagpatigayon ang imbestigasyon kasunod sang insidente sa diin wala lang ginlingling kundi gin-video pa mismo sang maestro ang non-teaching personnel samtang nagapaligo ini.
Suno kay Palabrica, ang nasambi nga improvised comfort room ang human lang sa trapal, kawayan kag bato kag balas ang salog.
Wala man ini nagalaom nga matabo ang kaangay nga insidente sa diin bangud professional ang mga manunudlo, kuntani magaserbe nga mayo nga ehemplo sa mga estudyante ilabi na sa mga Boy Scouts.
Mangin ang Department of Education (DEPED) ang magapatigayon man sang imbestigasyon.
Nakagwa naman sa presuhan ang maestro matapos nagpyansa, apang desidido ang tagreklamo nga pasakaan ini sang kaso nga paglapas sa RA 11313 Safe Spaces Act ukon ang Bawal Bastos Law.
Sa subong, gina-review na sang legal committee ang insidente sa diin ipasa nila ini sa National Executive Board nga amo ang may pinal nga desisyon.
Pormal naman nga magatakop ang aktibidad bwas, Nobyembre 28.
