Boying, ginklaro nga indi siya mag-apply bilang Chief Justice

Gin-athag ni Ombudsman Jesus Crispin “Boying” Remulla nga indi siya mag-apply sa posisyon nga Chief Justice sang Supreme Court.

Ini samtang naga-gwa na ang mga pangalan sang posible magbulos bangud sa nagahilapit nga mandatory retirement ni incumbent Chief Justice Alexander Gesmundo sa Nobyembre.

Suno sa opisyal, wala na siya sang iban pa nga ambisyon kag ang iya luyag amo ang mapadayon kag matapos ang iya trabaho bilang Ombudsman.

“I have no more aspirations. This is the job I want for myself…to be able to finish this job,” suno sa iya.

Gin-appoint siya bilang Ombudsman sang Oktubre 2025 kag magaserbisyo sa posisyon tubtob 2032.

Ginsabat ini ni Remulla sa media kadungan sang pag-atubang niya kag iban pa nga mga opisyal sang Office of the Ombudsman sa Senate Finance Committee agud depensahan ang proposed P7.2-billion budget sang ahensya para sa 2027.

Gin-aprubahan na sang komite sa committee level ang proposed budget sang Ombudsman bilang kabahin sang tikang sang mga senador nga mapabakod ang kapasidad sang ahensya sa pag-imbestigar kag pagpasaka sang kaso batok sa korapsyon.

Nahibaluan nga anum ka justices ang nagagwa nga posible contenders sa pagka-Chief Justice.

Ang lima ka senior justices nga pormal nga gin-imbitar sang Judicial and Bar Council amo sanday Senior Associate Justice Marvic Leonen; kag Associate Justices Alfredo Benjamin Caguioa, Ramon Paul Hernando, Henri Jean Paul Inting kag Rodil Zalameda.

Ginatulod man si Associate Justice Jose Midas Marquez sa amo nga posisyon matapos nga may grupo sang retired Regional Trial Court judges nga nag-endorso sa iya sa amo nga pwesto.#