ILOILO CITY – Wala pa sang mandu nga nabaton ang Business Permits and Licensing Office tuhoy sa pagpatuman sang ordinansa nga nagamandu sa pagtukod sang Iloilo City Liquor Licensing and Regulatory Council.
Ini ang kasunod sang pagpasar sang Iloilo City Council sa ginduso ni Iloilo City Councilor Jay Treñas nga regulation ordinance 2014-086 kadungan sang iya privilege speech nahanungod sa pagbuno-patay sa iya legislative staff nga si Mr. Jeffrey Solano sang Brgy. Jereos, La Paz, Iloilo City.
Sa interview sang Bombo Radyo kay Mr. Norman Tabud, pinuno sang Business Permits and Licensing Office, iya ginpahayag nga ginahulat na lang niya ang implementing guidelines bag-o ipatuman ang nasambit nga ordinansa.
Santo sa iya nahibalu-an suno kay Tabud, humalin sang ginpasar ang regulation ordinance 2011-786, wala pa napatuman ang ordinansa nga nagadumili sa pag-inom sa pampubliko nga lugar paglampas sang 11 sang gab-i kag amo man ang ordinansa nga nagamandu sa pagtukod sang Iloilo City Liquor Licensing and Regulatory Council nga ginpasar sang 2014.
Gin-athag man ni Tabud nga wala sang “conflict” sa Executive Order 46 ukon pagdula sang Liquor ban kag ang pagptuman sang duha ka mga nasambit nga ordinansa.
Nahibalu-an nga ang katungdanan sang Iloilo City Liquor Licensing and Regulatory Council amo ang pagpatuman sang programa tuhoy sa pag-regulate sang liquor selling, serving ukon dispensing sa syudad sang Iloilo.
