Nagdangat na sa 93 ang narekord nga COVID-19 positive nga empleyado sang Hinduja Global Solutions (HGS), isa ka Business Process Outsourcing (BPO) company sa SM Strata sa Senator Benigno Aquino Jr. Avenue, Mandurriao, Iloilo City.
Sa interview sang Bombo Radyo kay Mr. Jeck Conlu, spokesperson sang COVID-19 team, iya ginpahayag nga lunsay ginpaidalom na sa reverse transcription polymerase chain reaction (RT-PCR) test ang tanan nga empleyado sang nasambit nga kompaniya.
Suno kay Conlu, ipaidalom subong nga adlaw sa RT-PCR test ang 171 nga naka close-contact sang mga nagpositibo sa COVID-19 nga mga empleyado.
Sa subong suno sa natungdan, padayon pa nila nga ginatumod ang gin-ugatan sang paglatnanay sa COVID-19 sang mga empleyado.
