ILOILO CITY – Wala nakalab-ot sa standard sang Food and Drug Administration (FDA) ang lima ka brand sang langgaw nga may yara sang ‘synthetic acetic acid’.
Ini matapos nga nagpaguwa sang listahan ang FDA tuhoy sa mga langgaw nga ginabaligya sa merkado nga makabig sub-standard kag wala ginapanugyan nga gamiton.
Sa interview sang Bombo Radyo kay Dr. Elvin Tiangha, isa ka medical expert, iya ginpahayag nga ang mga langgaw nga may yara sang ‘synthetic acetic acid’ ang makabig nga sub-standard bangud nga ginpadali-an lang ang ‘fermentation process’.
Ang ‘fermentation process’ suno kay Dr. Tiangha amo ang ‘chemical breakdown’ sang isa ka substance kasubong sang bacteria, yeasts ukon iban nga microorganisms agud nga makahimo sang beer, wine, liquor kag vinegar.
Sa pihak sini, ginpahayag ni Dr. Tiangha nga ang ‘synthetic acetic acid’ ang indi man makaapekto sa ‘safety issue’ sang mga mga konsumidor apang ang mga langgaw nga may synthetic acid content ang makabig nga sub-standard ukon padali lang ang ‘fermentation process’.
Nahibalu-an nga lakip sa mga brand sang langgaw nga may yara sang ‘synthetic acetic acid’ amo ang mga masunod: Surebuy Cane Vinegar, Tentay Pinoy Style Vinegar, Tentay Premium Vinegar, Tentay Vinegar ‘Sukang Tunay Asim’, Chef’s Flavor Vinegar.
