Magabalik ang volleyball legend nga si Leila Barros sa Pilipinas para sa pag-host sang pungsod sang Men’s World Championship 2025.
Magatambong ang Brazilian superstar sa semifinals kag finals sa tournament sa Septyembre 27-28 sa Mall of Asia Arena kasunod sang personal nga imbitasyon nagikan kay Asian Volleyball Confederation kag Philippine National Volleyball Federation president Ramon “Tats” Suzara.
“She’s the icon who once captured the hearts of Filipino fans — and now, she’s returning for the biggest volleyball event in our nation’s history,” kabahin sang post sang tournament.
Nakahampang anay si Barros sa Manila sang 2000 FIVB Grand Prix kun sa diin nakuha sini ang suporta sang Pinoy volleyball fans. Kabahin man siya sang Brazilian national team nga nagdaog sang bronze medals sa 1996 kag 2000 Olympics
Sa pihak nga bahin, makasumpong naman sang Alas Pilipinas sa imbukada nga hampang sa tournament ang African powerhouse nga Tunisia apang wala ang ila star scorer nga si Wassim Ben Tara.
Nagapang-42 ang Tunisia sa world rankings kag nagpang-lima sa 2023 African Championship kag nagpang-16 naman sa 2022 World Championship.
Ang Italian tactician nga nagserbe nga deputy sa 2008 Beijing Olympics bronze-medal team sang Russia nga si Camillo Placi amo ang head coach sang Tunisia samtang si Angiolino Frigoni naman ang para sa Alas Pilipinas Men.#
