ILOILO CITY – Madamu sang natun-an nga leksyon ang isa ka bread winner sang pamilya sa na-eksperyensyahan nga kapaslawan sa pagpangabuhi kag sa ginpili nga career.
Sa interview sang Bombo Radyo kay Aladin, indi niya matuod nga pangalan, iya ginpahayag nga nagtapos siya sa kurso nga BS in Computer Science apang bag-o nakatapos sa pagtuon, madamu siya sang pagpanghangkat nga na-eksperyensyahan.
Bilang kamagulangan sa anum ka mag-ulutod, ginpahayag ni Aladin nga siya na ang nagtindog nga bread winner sa ila pamilya kag nagabulig sa iya amay sa pagpangita sang palangitan-an.
Ginpahayag ni Aladin nga samtang naga-eskwela, kinahanglan niya nga balansehon ang academics kag ang pagtrabaho agud nga makabulig sa iya pamilya.
Nagligad ang tinuig suno kay Aladin tubtub nga nakatapos siya sang pagtuon kag naka-angkon sang trabaho.
Nagpasaylo-saylo sang trabaho gikan sa appliance center tubtub nga nakatrabaho sa isa ka pharmaceutical company.
Umpisa sadto suno kay Aladin, amat-amat na nga nagbugana ang ila pagpangabuhi tubtub nga nakapundar sang negosyo kag propidad.
Bangud nga bastante na sa kwarta, naghalin siya sa iya trabaho kag nagsentro na lang sa kaugalingon nga negosyo.
Samtang naga-uswag ang pagpangabuhi, kasubong suno kay Aladin nga nalimtan niya nga magkinot kag nadulaan na sang tion sa iya pamilya kag sa Ginuo.
Gin-ako man sang natungdan nga bilang isa ka tawo, indi man niya malikawan nga makahimo sang kapaltahan kag napabay-an ang iya negosyo.
Humalin sadto suno kay Aladin, amat-amat na nga nagsarurot ang iya negosyo tubtub nga naubos ang iya tinago nga kwarta sa bangko kag ang iya ginpundar nga propidad.
Ang mga mala-in nga sirkumstansya nga natabo suno kay Aladin ang nagtuga sang depression sa iya ilabi na nga tuman ka daku ang ginbag-o sang iya nga pagpangabuhi.
Sa pihak sini, ginpahayag sang natungdan nga wala gid siya nagdula sang paglaum agud nga makabangon liwat paagi sa iya mga natun-an gikan sa kapaslawan kag sa bulig sang iya pamilya kag mga abyan.
Sa subong suno kay Aladin, amat-amat na niya nga nabawi ang kun ano man ang nadula sa iya sadto.
