ILOILO CITY – Mas targeted na sa subong ang pagbulong sa mga may yara sang cancer ilabi na sa mga babayi nga may yara sang bukol sa dughan.
Ini ang ginpahayag ni Dr. Anita Jesena, medical oncologist, may kaangtanan sa pagdumdom sa Breast Cancer Awareness Month subong nga Oktubre.
Sa interview sang Bombo Radyo kay Dr. Jesena, iya ginpahayag nga sa syudad sang Iloilo sa subong, bastante ang medical oncologist kag mas ginpasangkad ang mga medical services nga ginatanyag sa tagsa ka hospital indi kaangay sadto nga limitado lamang.
Suno kay Dr. Jesena, magluwas sa medical oncologist ukon mga eksperto nga nagabulong sa cancer patients, mas nagdamo naman ang medical practitioners gikan sa nagkalain-lain nga patag sang medisina.
Ginpahayag ni Dr. Jesena nga bangud sa COVID-19, nagakahangawa ang mga pasyente nga magpadulong sa hospital kag clinic agud magpakunsulta sa doktor kag kun mapabay-an, mahimo nga maglala ang breast cancer.
Bangud sini, ginpanugyan ni Dr. Jesena nga para sa early detection sang breast cancer, mahimo sundon ang Breast Self-Examination paagi sa paglantaw kag paghikap sang dughan.
Para sa mga naga-edad sang 20 anyos pataas, mahimo nga magpatigayon sang Breast Self-Examination, 2 tubtub 3 ka adlaw matapos ang menstruation kag para naman sa mga wala na sang matres kag nagmenopause na, mahimo nga magpatigayon sang Breast Self-Examination sa una nga adlaw sang tagsa ka bulan.
Sa tion nga may makita nga pagbag-o ukon may mahikapan nga bukol sa suso ukon sa palibot sang dughan, gilayon nga magpakig-angot sa doktor para sa nagakaigo nga medical attention.
