ILOILO CITY– Indi pa mahimo nga magamit ang breath analyzers nga ginbakal sang Highway Patrol Group bangud sa pila ka mga rason.
Sa interview sang Bombo Radyo kay Police Colonel Al Loren Bigay, Deputy Regional Chief sang Highway Patrol Group 6, iya ginpahayag nga limitado ang ila paggamit sang nasambit nga apparatus bangud sa kakulang sang supply lakip na ang maintenance.
Suno kay Bigay, may yara lang sang walo ka breath analyzers kag isa diri ang guba rason nga kinahanglan pa nga ibalik sa talatapan sang Land Transportation Office.
Ginpahayag ni Bigay nga indi man sila sa subong makagamit sang equipment bangud bag-o lang nakatapos sang training ang mga katapo sang Highway Patrol Group.
Kinahanglan pa nga i-reset ang date sang breath analizers bangud 2017 ang tuig nga nagaguwa sa resibo.
Problema man suno sa natungdan kun sa diin sila makuha sang tube para sa apparatus bangud limitado lang ang nahatag sa ila kag wala pa sila nakahibalo kun sa diin ini mahimo mabakal bangud disposable ini.
Gin-athag man ni Bigay nga ang paggamit sang breath analyzer ang indi basta-basta bangud nagakadapat nga may yara sang probable cause kag kun may yara sang natabo nga vehicular accidents ukon traffic accidents.
