ILOILO CITY – Liwat na naman nga nakakuha sang presidential award ang Brgy. Calumpang, Molo, Iloilo City matapos nga gindeklarar nga champion sa National Lupong Tagapamayapa Incentive Award.
Sa interview sang Bombo Radyo kay Punong Barangay Roberto Niño, iya ginpahayag nga ang Lupong Tagapamayapa Incentive Award ang isa ka presidential award nga ginahatag sang Department of Interior and Local Government.
Suno kay Niño, may yara sang apat ka kategorya nga mahimo pili-an kag ini ang ginalakipan sang 4th to 6th class municipality, 1st to 3rd class municipality, component city kag highly urbanized city.
Ginpahayag ni Niño nga ang Brgy. Calumpang ang nalakip sa highly urbanized city category kag nakabaton sang P300,000 nga cash kag trophy bilang champion samtang ang 1st runner-up naman ang nagbaton sang P150,000 nga cash kag trophy kag ang 2nd runner-up ang nagbaton sang P100,000 nga cash kag trophy.
Katuyu-an sang Lupong Tagapamayapa Incentive Award suno sa Punong Barangay amo nga hatagan sang pagkilala ang pagpasangkad sang barangay justice system sa pagsolbar sang inaway ukon indi pag-intindihanay sa isa ka lugar.
Nahibalu-an nga ang Brgy. Calumpang ang ginakabig na nga hall of famer sa nasambit nga pasidungog.
