ILOILO CITY – Ginapakasuhan sang Sangguniang Panlungsod ang mga punong barangay sa siyudad sang Iloilo nga involve sa iligal nga droga.
Sa interview sang Bombo Radyo kay Iloilo City Councilor Jeffrey Ganzon, chairman sang Committee on Dangerous Drugs and Rehabilitation sa Konseho, ginpahayag sini nga ipasa nila sa Office of the Ombudsman ang pangalan sang mga punong barangay agud maimbestigaran kag mapasakaan sang nagakaigo nga kaso.
Lakip sa mga ini amo sanday Punong Barangay Remia Prevendido Gregory sang Barangay Bakhaw, Mandurriao, nga utod sang no. 1 drug lord sa Western Visayas nga si Richard Prevendido kag Punong Barangay Keith “Dabing” Espinosa sang Barangay Monica Blumentritt, City Proper nga asawa sang drug personality nga si Jingjing Espinosa
Samtang wala naman malakip sa mga posible nga kasuhan ang isa pa sa mga ginatudlo nga drug protector nga si Punong Barangay Noemi Jablo sang Desamparados, Jaro nga misis sang drug personality nga si Rasty Hablo nga naghikog sa General Santos.
Suno kay Ganzon, gross neglect of duty ang atubangon nanday Gregory kag Espinosa bangud wala ang mga ini nagpasa sang ila Barangay Drug Abuse Council (BADAC) report kag wala man ang mga ini sang ginhimo agud mapauntat sa pag-operate sa pagbaligya sang iligal nga droga ang ila himata.
Samtang si Jablo ang wala naman malakip sa mga ginpasakaan sang kaso bangud ini ang mangin moot and academic matapos nga napatay naman ang iya bana.
Dugang pa sang konsehal, sang buhi pa ang bana ni Jablo, wala man ini naga-istar sa Brgy. Desamparados gani wala ini sang katungdanan nga ilakip sa BADAC report.