ILOILO CITY – Magapatigayon sang exploratory learning kag on-site visitation ang mga punong barangay sang Iloilo City, sa siyudad sang Naga.
Suno kay Punong barangay Rey Rico sang Block 22, PHHC, Mandurriao, Iloilo city, sa nabaton sini nga imbitasyon, nakasaad nga sa Marso 29 tubtob Abril 1 subong nga tuig, ang paglakat sang mga barangay kapitan.
Nagalab-ot sa P28,650 ang registration sang kada isa nga para sa ticket sa eroplano, terminal fee, hotel accomodation, meals, kits kag printed materials.
Tinutuyo sang field trip nga mahibaluan ang tuhoy sa Disaster Risk Reduction Management; Mamamayang Ayaw Sa Anomalya, Mamamayang Ayaw sa Iligal na Droga (MASA-MASID) kag federalism sa Naga City nga isa ka awarded city.
Apang para sa barangay kapitan, uyang lang sa kwarta ang patigayunon nga field trip rason nga indi siya mag-upod.
Suno kay Rico, indi na kinahanglan nga magkadto pa sa Naga City agud mahibaluan ang tuhoy sa Disaster Risk Reduction Management, MASA-MASID kag federalismo bangud madamo sang mga resource person sa siyudad nga mahimo imbitaron agud ipa-intyindi ini.
Pahayag pa sini, ang igabayad nga P28,650 sang kada isa nga mag-upod ang mas maayo nga i-invest na lang sa barangay agud may pasalamatan pa ang mga pumuluyo.