Hugot sa gihapon nga ginapatuman sang Brgy. East Baluarte, Molo, Iloilo City ang ila ordinansa nahanungod sa No parking sa mga dalanon sa ila lugar.
Sa interview sang Bombo Radyo kay Punong Barangay John Garry Patnubay sang nasambit nga barangay, iya ginpahayag nga may ara man sila sang ginapatigayon nga road clearing operations agud malikawan ang pag-park sang mga salakyan ilabi na sa mga mayor nga mga karsada sa ila barangay.
Suno kay Patnubay, luyag man nila nga magpangayo sang bulig sa Iloilo City Government kun may ara gid sang mga masabad nga mga nagapanag-iya sang salakyan.
Ginpakigbahin man sang Punong Barangay nga may ara sang penalidad ang magalapas sa ila ordinansa:
1st Offense: 500 pesos
2nd Offense: 700 pesos
3rd Offense: 1, 000 pesos
Suno pa sa iya, ini nga ordinansa ang may dako nga bulig sa ila barangay in kaso nga may ara sang magluntad nga mga insidente kaangay sunog agud indi mabudlayan ang mga bombero.
Dugang pa sang Punong Barangay nga mas maayo nga may ara gid sang parking area ang mga private car owners agud nga indi mag-obstruct ang ila nga mga salakyan sa mga dalanon.
