Gilayon nga nakagwa sa presuhan ang kagawad nga nagtiro sang isa ka delivery truck sang tubo sa banwa sang San Enrique, Iloilo matapos nga nakapyansa.
Ang barangay kagawad amo si Rogen Pama, residente sang Brgy. Imbang Pequeño, San Enrique, Iloilo.
Si Pama ang umagad man sang Vice Mayor sang banwa sang San Enrique nga si Ernesto P. Palomado.
Samtang ang driver sang truck amo si Jay Agujetas, residente sang Brgy. Abaca, San Enrique, Iloilo.
Sa interview sang Bombo Radyo kay Police Lieutenant Christy Val Dalde, hepe sang San Enrique Municipal Police iya ginpahayag nga matapos mapreso sang isa ka gab-i si Kagawad Pama, gilayon man ini nga nakagwa kasunod sang pagpyansa sini sang ₱50,000.
Wala naman makuha sa kagawad ang pusil nga gingamit niya sa pagpaniro apang ginkumpirma sang kapulisan nga na-igo ang na-wala nga bahin sang truck.
Nahibaluan nga naghalin ang duha ka salakyan sa syudad sang Passi kag padulong kontani sa banwa sang San Enrique, apang, nagit-gitanay ang duha sa dalan rason nga nagtuga sang komosyon sa mga driver sini.
Bangud diri, ginpanaog sang barangay kagawad ang iya windshield kag gintiro padalom ang truck nga may karga nga tubo.
Gilayon naman nga nagpalagyo ang driver sang Mitsubishi Xpander, apang, natandaan ini sang driver sang truck lakip na ang plate number.
Nagpatuman naman sang hot pursuit operation ang San Enrique PNP kag naabtan ang barangay kagawad nga driver nga yara na sa ila balay.
Natukiban man nga may impluwensya sang makahulubog nga ilimnon ang nasambit nga kagawad.
