ILOILO CITY–Masami nga nagapakawal sang armas luthang ang napatay nga Barangay Kagawad nga nagbato sang ginserbehan sang search warrant sa Brgy. Pianda-an Norte, Alimodian, Iloilo.

Sa interview sang Bombo Radyo kay Police Inspector Danilo Noca, hepe sang Alimodian Municipal Police Station, iya ginpahayag nga madamu sila sang may nabaton nga reklamo tuhoy sa masami nga pagpakawal sang armas luthang ni Barangay Kagawad Ritchel Misari, 38 anyos sang nasambit nga lugar.
Santo sa blotter reports, nakaagi man sadto suno kay Noca nga may ginsulod nga balay si Misari kag nagpangtaya sang armas luthang.
May yara man suno kay Noca sang reklamo batok kay Misari nga nagapakawal sang armas sa tion sang gab-i.
Sa pagsaysay ni Noca, iya nga ginsugo ang intelligence officer nga si PO3 Jonathan Guzman nga magpatigayon sang monitoring sa balay ni Misari.
Mahimo suno kay Noca nga namutikan na ni Misari nga ginabantayan siya ni Guzman kag hinali lang nga gintiro sang Barangay Kagawad ang pulis nga naigo sa hawak kag yara na sa maayo nga kahimtangan.
Gilayon nga nagpangayo sang augmentation force ni Noca agud nga madakpan ang nakapalagyo nga Barangay Kagawad
Nakita si Misari sa Barangay Piandaan East Maasin, Iloilo sa diin una nga nagpalupok sang armas ang Barangay Kagawad.
Napilitan ang composite team nga magbalos rason nga naigo sa dughan si Misari nga dead on arrival naman sa ospital.