𝗟𝗔𝗣𝗔𝗭, 𝗜𝗟𝗢𝗜𝗟𝗢 𝗖𝗜𝗧𝗬 —Nagpa-Bombo ang isa ka residente sang Barangay Baldoza, Lapaz, Iloilo City matapos ginapahayag nga ginsipa siya sang ila barangay kagawad nga si Freddie Jarbadan.
Sa interview sang Bombo Radyo kay Josie Bendanillo, tagreklamo, iya ginpahayag nga nangape-ngape ini kaupod ang anay mga kapitan sang lugar sa atubang sang ila puluy-an kag nag-istoryahanay.
Suno kay Bendanillo, matapos sila nga nagpangape, gilayon sila nga naglakat, apang sang siya ang nagapabalik na sa ila puluy-an, hinali lang nga nag-eskandalo si kagawad Jarbadan kag ang iya ginasinggitan amo ang ginareklamo nga lamesa nga yara nakahamtang sa karsada.
Ginpahayag man sini nga nakig-istorya sa kagawad ang ila punong barangay kag nagsiling nga kaupod sila nga naggamit sang lamesa.
Gin-athag man sang natungdan nga siya mismo ang naghimos sang lamesa kag wala sang ano man nga may ginhambal, apang ginkakibot niya lamang sang nagpadulong ang kagawad sa ila puluy-an kag siya ang gintindakan sa pribado sini nga parte sang lawas.
Nagpanindugan man si Bendanillo nga wala naka-obstruct ang lamesa sa dalan bangud makapila ka beses nga nakalabay ang salakyan sang amo nga kagawad.
Ini ang baliskad man sa ginrason ni Jabardan nga naga-obstruct ang lamesa sa alagyan.
Ginpanginwala naman sang tagreklamo nga supporter siya ni Iloilo City Lone District Representative Julienne “Jam-jam Baronda”.
Desidido naman nga magpasaka sang legal nga reklamo si Bendanillo batok sa nasambit nga barangay kagawad.
