Gin-ideyahan na lang sang mga barangay officials ang nabaton nga mga food packs halin sa Department of Social Welfare and Development (DSWD) Region 6 bangud tuman ini ka-kulang para sa mga pumuluyo sa syudad sang Iloilo.
Sa interview sang Bombo Radyo kay Punong Barangay Ariel Mirar sang Hibao-an Norte, Mandurriao, Iloilo City, iya ginpahayag nga masobra 500 ang residente sang iya barangay kag gin-una anay hatagan sang bugas kag canned goods ang mga nadulaan sang trabaho kag Persons with disability.
Suno kay Mirar, may ginbakal man mismo ang barangay nga bugas nga amo naman ang ginahatag sa pumuluyo nga nagapangayo sini.
Samtang sa Nabitasan, La Paz naman, ginpahayag ni Punong Barangay Barbie Aroza nga ang inisyal nga food packs nga nabaton ang ginhatag anay sa mga frontliners kag indigent nga pumuluyo.
Ginpaathag na lang sang punong barangay sa mga residente ang estado subong sang ayuda agud nga indi ini magtuga sang problema.
