SARA, ILOILO – Ginkumpirma sang barangay officials sang Aposaga, Sara, Iloilo nga sila mismo ang nagahiwat sang checkpoint sa ila nga barangay sa nasambit nga banwa.
Sa interview sang Bombo Radyo kay Punong Barangay Juvy Bornales, iya ginpahayag nga luyag lang nila masiguro ang seguridad sang ila barangay agud nga wala sang malain nga elemento ang makasulod sa lugar.
Suno kay Bornales, indi pagpamalabag ang ila nga ginahimo bangud wala man ginadumilian ang kontra partido nga makasulod sa ila nga barangay.
May yara sang log book nga nakahanda para sa mga tawo nga nagasulod sa Brgy. Aposaga agud nga mahibaluan ang ila nga tinutuyo.
Ginpaathag man sang punong barangay nga una na siya nga naglisensya kay Police Captain Ascension Ortizo, hepe sang Sara Municipal Police Station kag siya ang ginpahanugutan man sang hepe nga maghiwat sang checkpoibnt sa nasambit nga barangay.
Si Bornales ang ginkilala nga supporter sang mayoralty candidate nga si Retired Army General Jon Aying.
