ILOILO CITY – Ginreklamo sang City Drug Enforcement Unit (CDEU) sa City DILG ang mga opisyales sang Barangay Bakhaw, Mandurriao, Iloilo City.
Ini ang may kaangtanan sa indi pagkooperar sang mga barangay officials agud magpirma sa ginpatigayon nga inventory sa raid sang Hunyo 21, 2018 sa diin naaresto ang call center agent nga si Mary Rose Broce, 39 anyos, sang San Miguel, Iloilo kag ang kahimbon nga si Joseph Bañas.
Suno kay CDEU team leader SPO1 Alfred Tilano, ginhimo nila ang tanan nga pagpanikasog agud malab-ot ang mga opisyal sang barangay kalakip na ang sadto buhi pa nga si anay Punong Barangay Remia Gregori.
Suno kay Tilano, lunsay nagpamalibad ang mga opisyal sang barangay kag ginpahayag nga wala sa ila mga puluy-an.
Ang ila lihok suno kay Tilano ang kuntani mangin basehan sang DILG agud paandaman ang iban pa nga barangay officials sa siyudad nga indi nila pagbalewalaon ang ila katungdanan ilabi pa nga mahimo ini mag-apekto sa kaso nga ipasaka sa mga madakpan.