Epektibo na subong nga adlaw ang Executive Order 27 ni Bingawan, Iloilo Mayor Mark Palabrica nga pagpaidalom sa Modified Enhanced Community Quarantine (MECQ) status ang Barangay Poblacion tubtob sa Hunyo 24, 2021.
Ini ang kasunod sa narekord nga 26 ka mga COVID-19 cases kag isa ka patay sa nasambit nga barangay.
Sa interview sang Bombo Radyo kay Mayor Palabrica, iya ginpahayag nga base sa nasambit nga executive order, nagakadapat nga isa lang kada pamilya ang may yara sang quarantine pass agud nga magbakal sang pagkaon kag bulong.
Ang municipal hall kag merkado ang padayon nga maga-operate.
Suno kay Palabrica, padayon naman ang pagpatrolya sang mga kapulisan kag pagbantay sa checkpoints ilabi na sa border sang Barangay Poblacion.
Nagpanugyan man ang alkalde sa mga pumuluyo nga magkooperar kag sundon ang mga executive orders nga ginapatuman bangud tinutuyo sini nga mapunggan ang paglapta sang COVID-19.
