ILOILO CITY – May yara sang kaugalingon nga Material Recovery Facility ang Brgy. Rizal Pala-Pala 1, Iloilo City.
Sa interview sang Bombo Radyo kay Brgy. Kagawad Rodney Escultiro, iya ginpahayag nga ang Material Recovery Facility sang ila barangay ang napahamtang sa Iloilo Terminal Market kun sa diin man nagahaboy sang basura ang mga pumuluyo sang Rizal Pala-Pala 2.
Suno kay Escultiro, lain man ang ila Material Recovery Facility sa ginahabuyan sang basura sang mga manugbaligya sa Iloilo Terminal Market.
Kun kaisa suno kay Escultiro, indi man malikawan nga naga-awas ang mga basura bangud nga atrasado man ang pagkuha sang basurero.
Tuhoy naman sa pagtapna sa Dengue Hemorrhagic Fever, ginpahayag ni Escultiro nga sa tagsa ka Sabado, may yara sang ginapatigayon nga pagpaninlo kag spraying.
Ginpahayag ni Escultiro nga ang Iloilo City Government mismo ang naghatag sa ila sang chemical kag equipment.
Sa ginapatigayon nga Oplan Hawan, ginpahayag ni Escultiro nga ila gid nga ginasunod ang mandato ni Presidente Rodrigo Duterte.
Sa pagkamatuod suno sa Barangay Kagawad, ang dalan pasulod sa ila barangay ang indi maagyan sang salakyan sadto bangud sa madamo nga obstructions.
Sa subong suno sa natungdan, ginpangkuha na ang obstructions rason nga mahimo na mga maka-agi ang mga salakyan pasulod kag pagguwa sa ila barangay.
Ginatugyan na lang sang Barangay Kagawad sa ila Punong Barangay ang paghatag sang komento tuhoy sa bag-o lang ginpatigayon nga Lakbay Aral.
Suno kay Escultiro nga isa man sa naka-upod sa nasambit nga aktibidad, indi siya ang person in authority nga amo ang makahatag sang tul-id nga sabat tuhoy sa ginpatigayon nga aktibidad.
Para kay Escultiro, madamu siya sang tun-an ilabi na sa patag sang disaster preparedness kag waste segregation.
