ILOILO CITY – Ginkumpirma ni Punong Barangay Pascual Espinosa nga isa ang San Juan, Molo sa mga barangay sa syudad sang Iloilo nga ipaidalom sa lockdown epektibo buwas nga adlaw, Agosto 7.
Ini ang kasunod sang pahayag ni Mayor Jerry Treñas nga may pila ka mga barangay nga may yara sang local transmission sang Coronavirus Disease 2019 (COVID-19).
Sa interview sang Bombo Radyo kay Espinosa, iya ginpahayag nga magluwas sa COVID-19 positive, may yara sang pasyente nga residente sang ila lugar nga ginbawi-an sang kabuhi.
Ang nasambit nga pasyente suno kay Espinosa ang bedridden na kag ginbawi-an sang kabuhi sa hospital.
As of August 6, ginpahayag sang Punong Barangay nga wala pa siya sang may nabaton nga impormasyon kun tubtub san-o ang igapatuman nga lockdown kun sa diin naglab-ot na sa 10 ang nagpositibo sa virus.
