ILOILO CITY- Naplastar na sang Barangay Council sang Tacas, Jaro, Iloilo City kon sa diin magakadto ang P20M nga balor sang proyekto gikan sa National Task Force to End Local Communist Armed Conflict (NTF ELCAC) matapos nadeklarar ini bilang isa sa mga communist terrorist groups-cleared barangays sa syudad.
Sa interview sang Bombo Radyo kay Punong Barangay Joseph Poral, iya ginpahayag nga mangin prayoridad nila ang pag-improve sang health center sa diin P9M pesos ang ila ginpain para diri.
Nagtigana man sang P3.5M para sa pagpahamtang sang mga streetlights kag P3M para sa pagpatukod sang mga comfort rooms.
Ang mabilin naman sa nasambit nga kantidad ang ipain para sa farm to market road kag sa COVID vaccination sa mga pumuluyo sa barangay.
Nahibaluan nga nalakip man sa package of programs para sa Barangay Development Fund para sa mga cleared barangays amo ang crops, livestock kag fisheries projects sang Department of Agriculture, projects sang Technical Education and Skills Development Authority, proyekto sa idalom sang Department of Information and Communications Technology kag iban pa nga ahensya kaangay sang Department of Labor and Employment, Department of Social Welfare and Development, kag Office of the Presidential Adviser for Peace, Reconciliation and Unity (OPAPRU).
