POTOTAN, ILOILO – Desidido nga magpasaka sang kaso ang Barangay Tanod nga ginapahayag gintayaan sang armas-luthang sang bodyguard sang isa ka pulitiko sa Brgy. Naslo, Pototan, Iloilo.
Sa interview sang Bombo Radyo kay Brgy. Kagawad Edgardo Estrevo sang nasambit nga lugar, iya ginpahayag nga ang tagreklamo amo si Brgy. Tanod Robelito Canzon samtang ang ginareklamo naman amo si certain Nono Papilota.
Dugang pa ni Estrevo, indi lang niya matul-id kun sin-o nga pulitiko sa Dingle, Iloilo ang ginaserbisyuhan ni Papilota.
Sa pagpaathag sang Brgy. Kagawad, nagresponde sila sa isa ka kinagamo malapit sa eskwelahan kaupod ang mga naka on-duty nga Brgy. Tanod.
Sang nakapana-og na sila sa ila salakyan, hinali lang nga gintayaan ni Papilota si Canzon sang .45 caliber pistol sa wala mahibalu-an nga rason.
Bangud sini, luyag naman sang Brgy. Tanod nga magpasaka sang kaso batok kay Papilota.
