Pagabutangan sang maayo nga sistema sang Barangay Zamora-Melliza, Iloilo City ang pagkuha sang mga pumuluyo sang rasyon tubig nga ginahatag sang Iloilo City Government.
Ini agud malikawan ang mga inaway kag kinagamo nga nagakatabo bangud sang agaway sa tubig.
Sa interview sang Bombo Radyo kay Punong Barangay Lloyd Abadiano, iya ginpahayag nga nagacoordinate na sila subong sa City Disaster Risk Reduction and Management Office (CDRRMO) kag ginapa-follow up na kun san-o maabot ang dugang nga mga drums nga pagabutangan sang tubig.
Suno kay Abadiano, kada bulan sang Marso kag Abril naga-eksperyensya gid sila sang kakulangan sang tubig ang ila barangay.
Apisar may iban nga residente nga nagapadeliver sang tubig halin sa niwasa, dako sa gihapon nga bulig ang pagbutang sang mga tangke kag maayo nga scheduling sang rasyon bangud makabulig gid ini sa mga pumuluyo.
Suno pa sa Punong Barangay nga agud malikawan ang pag-ilinaway, may yara sila sang proseso nga ginapatuman sa pagpanagtag sang tubig kun sa diin kada drum may ara sang assigned nga kagawad nga magabantay agud masiguro ang organisado kag patas nga pagpanagtag sang tubig sa ila pumuluyo.
Dugang pa sang Punong Barangay, dako nga bulig para sa komunidad ang duha ka drums nga igahatag sang City Government bangud makadugang ini sa kapasidad sang barangay sa paghatag sang tubig sa ila residente nga labi nagakinahanglan.
