Nagapati si Bureau of Corrections Director General Undersecretary Gerald Bantag nga padayon sa gihapon ang bribery sa sulod sang New Bilibid Prison apisar may pagbag-o na sa liderato sang Bureau of Corrections.
Suno kay Bantag, ginatarget sa gihapon sang mga drug lord nga yara sa sulod sang Bilibid ang mga opisyales sa diin ila ginatinguhaan nga baklon pati ang kalag sang mga otoridad.
Si Bantag ang gin-appoint bilang BuCor director general sang tinalikdan nga bulan matapos nga ginsipa sa pwesto ni Presidente Rodrigo Duterte si Nicanor Faeldon bangud sa paghilway sa mga high profile convicts sang heinous crimes bangud sa Good Conduct Time Allowance.
Nangin kontrobersyal man sadto si Bantag bangud siya ang ginatudlo responsable sa pagkapatay sang 10 ka mga preso sa pagpamomba sa Parañaque City Jail sang Agosto 2016 samtang siya ang isa pa ka warden.
Ginasiguro naman ni Bantag nga magapangatubang sang kaso kriminal kag administratibo ang mga personnel nga matukiban nagabaton sang suhol sa mga preso.
Samtang may mga bag-o nga gwardya naman ang New Bilibid Prison nga mga myembro sang 33rd Special Action Company kag 3rd Special Action Battalion nga magabantay sa bilibid.
