Posible nga mabuyagyag sang Senate Blue Ribbon Committee ang panibag-o nga mga ebidensya halin sa anay engineer sang Department of Public Works and Highways (DPWH) sa Bulacan nga si Brice Hernandez.
Kadungan ini sang pagpadayon sang imbestigasyon sa mga kwestyonable nga proyekto sa flood control subong nga Martes, Setyembre 23.
Suno kay Senate President Pro Tempore Panfilo “Ping” Lacson nga amo man ang nagapanguna sa blue ribbon panel, ang ebidensya ni Hernandez ang indi lamang limitado sa alegasyon sang “kickback” batok kanday Senator Jinggoy Estrada kag Senator Joel Villanueva.
Suno kay Lacson, kinahanglan nga siguruhon anay ang “integridad sang chain of custody” sang ebidensya. Suno sa iya, ini ang makabulig sa piskal sa pagpasaka sang kaso.
Gina-alegar ni Hernandez nga may transaksyon nga natabo sa tunga nila sang duha ka senador may kaangtanan sa mga anomalya nga flood control projects.
Suno kay Lacson, indi pa cleared ang duha ka senador, bangud posible nga may koneksyon sila sa alegasyon nga insertion sang P355 milyon sa 2025 nga budget kag P600 milyon sa 2023 nga budget.
Ini ang ikalima nga hearing sang komite kaangot sa nasambit nga imbestigasyon kag ikaduha nga tion nga pangunahan ni Lacson bilang chairman sang amo nga Senate panel.
