ILOILO – Handa na ang tanan sa pagpatigayon sang Brigada Kontra Dengue nga pangunahan sang Department of Education buwas nga adlaw.
Sa interview sang Bombo Radyo kay Dr. Miguel Mac Aposin, Iloilo School’s Division Superintendent, iya ginpahayag nga ang nasambit nga kampanya ang patigayunon sa mga eskwelahan sa 43 ka mga banwa lakip na ang component city nga syudad sang Passi.
Ang nasambit nga kampanya ang nakasentro sa pagpanglimpyo sang mga eskwelahan sa syudad kag probinsya sang Iloilo agud matapna ang pagduging sang mga lamok nga may dala nga Dengue Hemorrhagic Fever.
Ginabi-abi ni Aposin ang mga ginikanan, barangay officials, health workers, manunudlo tanan nga mga pumuluyo kag mga volunteers nga magpakigbahin sa nasambit nga kampanya.
Suno sa natungdan, mahimo man nga magpakigbahin ang mga estudyante ilabi na gid ang mga Senior High School kag Student Leaders kun may yara sang parent’s consent ngapirmado sang ila ginikanan.
Gin-athag ni Aposin nga kadungan sang pagpanglimpyo, may yara man sang lecture sa mga pumuluyo tuhoy sa paglikaw sa nasambit nga balati-an.
Samtang, suno naman kay Clarissa Zamora, Officer-In-Charge sang Department of Education-Iloilo City, preparado naman ang tanan nga eskwelahan sa syudad sang Iloilo para sa patigayunon nga Brigada Kontra Dengue.
Ginpahayag ni Zamora nga ang nasambit nga kampanya ang naumpisahan na sang Mayo kag ginapadayon sa tagsa ka bulan.
Nahibaluan nga ang kampanya nga Brigada Kontra Dengue ang kabahin sang ila pagsunod sa Executive order number 16 nga ginapaguwa ni Iloilo Governor Arthur ‘Toto’ Defensor Jr. sa diin ginahingyo ang tanan nga magbuligay sa pagpanglimpyo agud mapunggan ang pagdamo sang lamok nga nagadala sang balati-an.
