ILOILO CITY- Nagahugyaw subong ang Brisbane City sa estado sang Queensland, Australia bangud ini ang mangin host sang Summer Olympics sa 2032.
Ginhimo sang International Olympic Committee ang announcement sa Tokyo antes ang pag- umpisa sang 2020 Summer Olympics sa Japan.
Magluwas sa pag- host sa Summer Olympic games sa ikatlo nga kahigayunan, i-host man sang Brisbane ang Paralympic Games.
Sa interview sang Bombo Radyo kay Bombo International Correspondent Denmark Suede, direkta sa Brisbane, iya ginpahayag nga ang hosting sang Olympics ang ginalauman nga maghatag sang 18 billion Australian dollar ukon P665B boost para sa ekonomiya sang Queensland.
Suno kay Suede, ang estimated cost naman sa preparasyon sang Brisbane para sa event ang yara sa $5 billion Australian dollar ukon kapin sa P185B.
Ginpahayag ni Suede nga indi man mangin mabudlay para sa Brisbane ang pagpreparar sang infrastructure para sa Olympics bangud ginamintinar man ang mga venues nga gin- gamit sa Commonwealth Games sang 2018 kag may yara lang sang himuon nga mga renovation kag expansion.
Ang Australia nag- host na sang Olympic Games sa Melbourne sang 1956 kag Sydney sang 2000.
Ang Paris France amo ang host sang 2024 Olympics; Milan kag Cortina d’Ampezzo sa Italy para sa 2026 Winter Olympics; Los Angeles sa 2028; samtang, ang Beijing naman ang maga- host sang 2022 Winter Olympics.
