Nagaplano ang British International Investment ukon BII, ang development finance institution sang United Kingdom, nga maghatag sang 1.6 billion dollars sa Southeast Asia, lakip na ang Pilipinas.
Ang nasambit nga pondo igagamit sa mga proyekto sa Pilipinas, Vietnam, Indonesia, Malaysia kag Thailand agud maatubang ang epekto sang climate change, mapadasig ang paggamit sang renewable energy kag makabulig sa pagdula sang fossil fuel pakadto sa malimpyo nga enerhiya.
Suno sa BII, katunga sang pondo ang igahatag paagi sa ila climate finance initiative nga British Climate Partners, samtang ginapaabot man nga may kaangay nga kantidad nga makuha halin sa mga private investor.
Pahayag pa nga halin 2023 tubtob 2025, naghatag na ang BII sang halos 400 million dollars nga climate financing sa rehiyon, lakip ang suporta sa renewable energy company nga ib vogt (ee-bee vote) sa Pilipinas, nga ginapaabot makahatag sang 400 gigawatt-hours nga limpyo nga kuryente kada tuig.
Dugang pa, plano pa nga dugangan pa sang British International Investment ang ila pondo agud mapadasig ang paggamit sang limpyo nga enerhiya, masuportahan ang padayon nga pag-uswag sang ekonomiya kag mabuhinan ang mga gas nga nagadugang sa pag-init sang kalibuta
Matandaan nga ginbuksan sang Pilipinas ang renewable energy sector sa mga foreign investor sang 2022, matapos amyendahan sang Department of Energy ang implementing rules and regulations sang Renewable Energy Act of 2008.
